Spesíur
EINFALDAR OG FLJÓTLEGAR SMÁKÖKUR SEM ERU ALGJÖR FREYJU KLASSÍK. FULLKOMNAR MEÐ KAFFIBOLLANUM OG ÓMISSANDI Á JÓLABORÐIÐ
Fyrir: 30 kökur | Tími: 30 mín | Erfiðleikastig: Auðvelt
Spesíur eru uppskrift sem upprunalega var alltaf gerð með Freyju dropum. Nú þegar Freyju droparnir eru komnir í nýjar umbúðir en hafa haldið sínum klassíska stíl er tilvalið að endurvekja þessa yndislegu uppskrift. Mamma hefur alltaf gert þessa uppskrift og var hún í raun kveikjan að samstarfinu okkar, enda voru Freyju droparnir alltaf til í bakstursskúffunni á mínu heimili. Nú gera mágkona mín og mamma hennar líka alltaf spesíur svo litlu frænkur mínar alast upp við þær úr öllum áttum og uppskriftin er alls staðar í fjölskyldunni.
INNIHALD
200 g smjör, við stofuhita
75 g flórsykur
250 g hveiti
1 poki Freyju súkkulaðidropar
AÐFERÐ
Setjið smjör og flórsykur í hrærivélaskál og hnoðið saman þar til blandan er komin vel saman.
Bætið hveitinu saman við og hnoðið þar til deigið er komið saman og orðið mjúkt og meðfærilegt.
Setjið deigið á borð og mótið það í kúlu með höndunum.
Skiptið deiginu í fjóra jafna hluta.
Rúllið hvern hluta í jafna lengju. Vefjið lengjurnar inn í sellófan eða bökunarpappír og setjið í kæli í að minnsta kosti 1 klukkustund, eða yfir nótt.
Forhitið ofninn í 180°C með blæstri.
Skerið deiglengjurnar í jafnar sneiðar og raðið þeim á bökunarplötu klædda bökunarpappír.
Bakið við 180°C með blæstri í 10–12 mínútur. Hægt er að baka tvær plötur í einu í flestum ofnum.
Takið kökurnar úr ofninum og setjið strax einn súkkulaðidropa ofan á hverja köku á meðan þær eru enn heitar.
Ekki bíða með súkkulaðið því hitinn frá kökunum hjálpar súkkulaðinu að festast.
Leyfið spesíunum að kólna alveg á plötunni þar til súkkulaðið hefur storknað.