Súkkulaði jólatré
MEÐ SALTSTÖNGUM, KÖKUSKRAUTI OG FREYJU SUÐUSÚKKULAÐI, KRAKKAVÆN JÓLAUPPSKRIFT SEM ALLIR GETA TEKIÐ ÞÁTT Í AÐ GERA
Fyrir: 10–12 jólatré | Tími: 45 mín | Erfiðleikastig: Mjög auðvelt
Þessi skemmtilega uppskrift er fullkomin fyrir litlar hendur og tilvalin í notalega samverustund um jólin. Leyfið krökkunum að sjá um skreytingarnar og hafa gaman af. Hægt er að pakka hverju jólatré fyrir sig í sellófan og nota sem lítið heimagert jólakonfekt eða jólagjöf til ömmu og afa.
INNIHALD
200 g Freyju suðusúkkulaði
10–12 saltstangir
Rís Kúlur
Kökuskraut
AÐFERÐ
Brjótið Freyju suðusúkkulaðið í litla bita og setjið í örbylgjuþolið ílát. Bræðið í 20–30 sekúndna lotum og hrærið vel á milli þar til súkkulaðið er silkimjúkt og alveg bráðið.
Setjið bökunarpappír á bakka eða plötu. Raðið saltstöngunum á pappírinn með góðu bili á milli.
Setjið brædda súkkulaðið í sprautupoka. Sprautið súkkulaðinu í sikksakklínur yfir saltstöngina. Byrjið á að gera breiðari línur neðst og mjórri eftir því sem þið farið ofar, þannig að það myndist lítið jólatré.
Á meðan súkkulaðið er enn mjúkt er kökuskrautinu raðað yfir trén og Rís kúla sett á toppinn eins og toppur á jólatrénu.
Setjið bakkann í kæli í 20–30 mínútur, eða þar til súkkulaðið hefur storknað.